==NEWS==
月薪5千到年賺500萬　王祖藍壓力爆煲：做到抑鬱

因在《荃加福祿壽》中扮演Handelababy 而爆紅的王祖藍，上周在伊館連開三場棟篤笑，事業再創高峰。據知祖藍03年入TVB時月薪只有5千，但過去短短一年卻勁賺500萬。祖藍從昔日二打六，到今天成富貴扮o野王，絕對是娛圈神話。
不過名利雙收背後，卻有苦自己知。王祖藍坦言個多月前因壓力爆煲而極度抑鬱，他說：「我晚晚天光至訓到，仲試過因度唔到橋而喊，真係好驚！」絕對是對人歡笑，背人垂淚！

近日，祖藍拋離兩位拍檔阮兆祥及李思捷，在伊館『子貝』飛開處男棟篤笑，做三場便袋30萬，對比03年加入無線當兒童節目主持，月入只得五千，可謂差天共地。

■ 免費做騷遇百樂

祖藍7年前加入無線，除了做兒童節目主持，便苦無機會，因此04年不惜以零身價參演羅敏莊、杜雯惠及梁榮忠自資搞的「Three Show」，當時他以戇直表情fing頭喪跳勁舞，令觀眾喜出望外。想不到這次無錢但自high的演出令他遇上伯樂，為其演藝神話揭開序幕。
據知《學警雄心》的監製黃偉聲正是《Three Show》座上客，睇完祖藍的搞笑表演，他深知這位演藝學院一級榮譽畢業生極有才華，之後返公司便向其他監製大力推介，更於翌年開拍的新劇《我外母唔係人》找他做第二男主角。雖然最後此劇受主角梁榮忠的「車震」事件拖累，只在收費台播出，但其演出口碑已傳遍TVB劇組。07年祖藍終於被曾勵珍揀中拍處境劇《同事三分親》，當中「樓華」一角，令他從此扶搖直上。


今日身價每場10萬
由大茄做到今日成為舞台主角，棟篤
笑叫好叫座，王祖藍的演藝事業絕對
係一個神話。據知其處男棟篤笑身價
是十萬蚊一場。兩日開三場，就賺o左
三十萬落袋。


家人 粉墨登場
為了撐祖藍的棟篤笑，跟他如同餅印
的阿媽（左）同細妹（中）作出犧
牲，在短片《荃家得六o舊》粉墨登
場。阿妹以浮誇表情一take過講出對
白：「我得兩o舊咋！」連執導該片的
羅敏莊都大讚有潛質。可惜祖藍話：
「阿妹係好戲，可惜佢只係有興趣當
社工。」


04年 0價做騷
04年羅敏莊自資開音樂會「Three Show」，搵老友祖藍幫拖當dancer兼搞gag，祖藍無酬勞都照做，並以搞笑表情配騎呢舞步，笑爆觀眾。
扮草蜢 變阿梅
扮o野有一手的祖藍（左），泊住另一演藝學院同學湯駿業（右）扮草蜢，伴「老翻阿梅」羅敏莊（中）唱〈愛將〉。 但祖藍嘟長個嘴，似乎佢想扮阿梅多過草蜢。

一手締造Laughing哥神話的監製黃偉聲（右），承認當年睇完「Three Show」後認定要扶祖藍一把。「睇完之後，我同公司o既人講，搵多o的機會俾佢，我亦即刻搵佢拍劇。所以今日睇到佢o既成續，我好欣慰。」
雖然《Three Show》o係當年而言絕對係奀騷，但既得黃日華出手相助做嘉賓，連劉華都有o黎捧場，仲即興上台吹o左陣水。相信劉華都估唔到，台上搞笑o既大茄祖藍，之後演「樓華」一角紅o左！

■ 經常手震失眠

不過七年的娛圈神話，除了換來名利，還賠上了健康。上周五祖藍在棟篤笑中途，忽然收起搞笑本色認真說：「開騷前兩星期我腦閉塞，完全度唔到橋，就黎開騷竟然未度晒橋，我好驚，情緒好低落，祈禱後心裏聽到一把聲音同我講：『tum人笑o既你點可以唔識笑！』我知道自己出o左事。」
完騷之後，他向本刊記者坦白承認，近月因工作壓力過大而極度抑鬱。「一年前公司話幫我搞棟篤笑，當時我覺得自己資歷仲係好淺，根本唔可以好似黃子華、林海峰咁，一個人『子貝』飛做棟篤笑，所以曾經向樂小姐推掉。但公司鼓勵我做，最後惟有頂硬上。」
信心不足，加埋工作排得密麻麻，自覺唔夠時間準備棟篤笑的祖藍，終於在開騷前爆煲，「我開始失眠，到天光先訓到，個心成日卜卜跳，經常處於驚恐狀態，隻手會不停震，越係咁越度唔到橋。我知道自己有嚴重抑鬱，所以即刻搵教會牧師傾偈，又搵一班教友幫我祈禱，好在情況o係開騷前半個月慢慢冇事。我好多謝班教友救番我，否則我會崩潰。經過呢件事，我會好好疏導自己情緒，o黎緊我又會做福音舞台劇，又會o係廣州同澳門做巡迴棟篤笑，但我會處理到。」

■ 出位歷程

祖藍03加入無線主持兒童節目《小Teen地》和《DaDaDeDe精靈樂園》。04年獲好友羅敏莊力邀上節目《有招出招》，其間祖藍扮二胡、吸塵機及青蛙等聲音扮得似模似樣。


對於祖藍開騷前有抑鬱，樂易玲話：
「好多Artists開騷前都有情緒低落，
好正常。所以我有keep住同佢傾計，
鼓勵佢。開完個騷佢信心大增唔再驚
啦！」


彈唔出
直到05年祖藍獲無線監製黃偉聲提拔演電視劇《我外母唔係人》第二男主角，以為吐氣揚眉，但該戲只安排在收費劇集台播出。《蘋果日報》圖片
出頭天
其間撈過電影《獨家試愛》小試牛刀，終在07年有幸參加《同事三分親》演「樓華」一角，得到多方面讚賞。《蘋果日報》圖片
成型期
強項扮o野的祖藍，07年被安排孖住阮兆祥和李思捷在《萬千星輝賀台慶》上扮草蜢表演，而福祿壽雛型亦由此衍生。《蘋果日報》圖片

撈過界
08年簽約英皇成為旗下歌手，其間又被曾志偉睇中加入獎門人做獎老，連香港小姐競選的司儀都撈埋，同年即獲得飛躍進步男藝員獎。《壹週刊》圖片
做主角
祖藍擔正拍電影《矮仔多情》，拍住Angelababy、徐子珊和官恩娜等人做大情聖，電影雖不賣座，卻令祖藍人氣再升。
爆人氣
10年無線替祖藍、阮兆祥和李思捷度身訂做綜藝節目《荃加福祿壽》，三位扮女人都扮到有聲有色。上周更開埋《咪咁扮o野王祖藍演o野會》，風頭認真一時無倆！

以上圖文來自2010年8月6日忽然1周